Fasnacht 07: Proklamation durch den Obernarren
Freitag, 16. Februar 2007
in Archiv bis 2007
Foto: Isabel Mäder/ST
[Alles über die Grenchner Fasnacht finden Sie hier.] (Dieser Link bezog sich auf eine alte Version von grenchen.net und könnte unter Umständen nicht mehr besucht werden.)
[Bildergalerien zur Fasnacht 07] (Dieser Link bezog sich auf eine alte Version von grenchen.net und könnte unter Umständen nicht mehr besucht werden.)
FASNACHT 2007
PROKLAMATION 2007
durch den Obernarren René Finger
am 15.Februar 2007
Die schönschti Zyt vom Johr isch do
d’Fasnacht isch wieder ine.
Für rächti Narre tuet ab jetz
au d’Narresunne schiine
Mir Gränchner si am Schwanz vor Schwyz
s’wott niemer do cho wohne
lueget - die blöd Parkiereri
i dene siebe Zone
Au dört - wö sött Begägnig si
fingsch jo kei müede Schinke.
Chasch froh si - wenn vom Tropical
dr eini chlei tuet winke.
Langsam - isch jedi Beiz verchauft
s’tüe Türgge do regiere.
Mir Schwyzer müesse afo jetz
üs langsam z’integriere.
As mir die höchste Stüüre hei
tuet no zum Räschte g’höre.
Do darf eim de - ne letschte Rang
au gar nüm heftig störe.
Dr Wanner und dr Banga
hei beid chlei s’glich System.
Cheffine wärde g’mobbt und bloggt
sobald si unbequem.
Me git ne hunderttuusig Stei
dr Wanner no chlei meh.
Die Wiibli näh’s – und haue ab
de muesch se nie meh g’seh.
Wenn dänksch - as mir für settig Spiel
so höchi Stüüre zahle.
Machsch d’Pfuscht im Sack und freusch di scho
as gli die nöchschte Wahle.
Dr Barbey und dr Gärber
regiere üsi Stadt.
Dr Bürger het das Regim (Reschim)
langsam – doch sicher satt.
Dr Erscht macht Löcher noch und noch
i d’Trottoir und i d’Wäge.
De loht er alli Bäum no um
und niemer isch dr gäge.
Dr Anger reglet dr Verchehr
mit Buesse und Schikane.
Umwäge – Schanze und Verbot
kei Stadt chunnt do dranane.
Vandale tüe ne Baumaschine
kaputt und z’Fätze schloh.
Ir gliche Nacht – es passt der zue
git’s es paar Iibrüüch no.
I dere Zyt fahrt d’Polizei
im warme BMW.
Stadt ab – Stadt uf – für irgendwo
ne Falschparkierer z’gseh.
Dr Banga meint – dr Gmeinrot heb
im Schrank nit alli Tasse.
Drum chönni dä – au sis Genie (Schenii)
so richtig nie erfasse.
Mit sire gross Bescheideheit
tuet är - Politik mache.
Und will är immer rächt wott ha –
mit allne sich verkrache.
Die Gälbe füehle sich betupft
die Schwarze sowieso verschnupft.
D’SVP redt vo Grössewahn
Die Rote g’heits - chlei us dr Bahn.
Nur Trummer – s’Amme – Lieblingsching
nickt Bifall füre Boris g’schwing.
Jetz no es Värsli oder zwöi, für Närrine und Narre wo eventuell vo Solothurn zu üs si cho:
S’meint von Rohr Chris - si Hingerteil
sig alls - wo är chönn biete.
Es wüssi jo die ganzi Schwyz
as är die gröschti Niete.
Am Färnseh het är s’Füdle zeigt
das wird mr g’stunke ha.
No besser das – as öppe s’Gsicht
das g’seht nit us nach Ma.
Dä Ablick isch zum Chotze gsi
es grusti no re Sau.
Kei’s Wunger laufe d’Lüt dr vo
no z’letschte die eiget Frau.
Es isch die neui Röti-Brügg
vo Afang schreeg und chrumm.
Für so nes Bauwärch weiss me jo
isch z’Solothurn - me z’dumm.
Jetz git’s de no e zwöiti Brügg
ganz gruusig i dr Form.
So abverheiti Bauerei
isch näb Barock - jetz d’Norm.
Tschau zäme und e wunderschöni Fasnacht
