(Paul-Georg Meister) – An der diesjährigen Gosche Nacht begeisterte Heinz Westreicher mit seinem Schnitzelbank. Für alle, die noch immer nicht genug haben, oder die Gosche Nacht 2009 nachtrauern, veröffentlichen wir an dieser Stelle den Schnitzelbank in seinem ganzen Wortlaut.
Gosche Nacht 09
Mi Chli dä schlooft ir Nacht nüm i
Het Angscht, wott nüm elleini si
Ich ha s’Gfühl dass die Psychose
Chunnt vom viele Märli lose
Denn mir gohts schliesslich au eso
Wenn ich s’GT lise do
Der Ospel isch is Migros gange
Stoht a der Kasse ire Schlange
Aer frogt wo är denn dra isch cho
ob sie die Cumulus-pünkt do
Au in Bar uszahle chönne
Är sött si Bonus drum no brönne
Mi Chli dä het e Sparsau no
Nur sone chlini wo är do
Vor churzem einisch gschlachtet het
Will är halt d’Chöle usgäh wett
Das cha me schliesslich no verstoh
Am nöchscht’ Tag isch der Tierschutz cho
is Reisebüro bin ich gange
Will ich eso uf d’Ferie plange
D’Antille sige no im Priis
Es traumhafts Insle Paradis
Wieso ich grad dört ane sett
wenns z’Gränche so viel Insle hett??
Dass d’Alarmierig funktioniert
Het me d’Sirene usprobiert
Und derbi denn usegfunde
Bi dere dört im Stadthus unde
Do schint irgend öppis z’chlemme
Will die dört zfriede witerpenne
Ich weiss es tönt provokativ
Doch d’Amis si eifach naiv
Sait der Obama Yes we can
Gwünnt är grad e hufe Fan
Sait der Murer ich chas au
De glaubt ihm das ir Schwiz kei Sau
Vor mängem Johr het ein verzellt
Und e neui Theorie ufgstellt
Wonach Mensche jemersnei
Ahne glich wie d’Affe hei
Weiss eine ob dä Darwin do
Ächt vo Soledurn isch cho
Vier Liter Wasser im Kanischter
Zwänzg Würscht no ipackt imne Plischter
Fünf Kilo Brot si auwä gnue
Villicht der Schlofsack no derzue
Es Surstoffzält no für ir Not
Und ufs Dach es Gummiboot
Es Notfallset chönnt eim no rette
Derzue e chemischi Toilette
Das lad ich alles i mi Chare
Wenn ich muess durch Gränche fahre
E schlächti Note im Betrage
Us dr Schuel ghörsch nume Chlage
Der Hansli deupelet au immer
Und d’Usdrück wärde immer schlimmer
är entschuldigt das Gebärde
Är well halt Bundesrot mou wärde
Zur Zit muesch wieder so viel grüesse
Do wird s’Grüesse fasch zum müesse
A jedem Ecke heissts grüess Gott
Stoht ein wo s’Pfötli schüttle wott
Und ich dänk mir do derbi
S’isch guet si d’Wahle gli verbi
D’Alpin WM in Val d’Isere
Für gwüssi Länder e Misere
Während d’Schwizer düe brilliere
Düe sich d’Oestricher blamiere
Läck bin ich froh dass niemer weiss
Dass ich Oeschtereicher heiss
Ähnliche Beiträge
Tags: grenchen.net, migros
